من يعقوب وزويل لعسلة والزلازل بالريموت!

‏إنتِ عارفة يا دكتورة… كان زمان العبقرية في مصر اسمها مجدي يعقوب و احمد زويل، النهاردة بقت عسله! زمان العالم المصري بيكتشف قوانين الطبيعة… دلوقتي حضرتك بتخترعي قوانين من دماغك وتسمِّيها “سر خطير”!
‏قوليلي كده… إنتِ بتدرّسي فين “علم الزلازل الإسرائيلي بالريموت”؟ واضح إنك اتخرّجتي من قسم خيال علمي، مش علوم. فجّرت إسرائيل خط نورد ستريم، فالأرض – حسب روايتك – اتخلخلت، وبقت جاهزة للهزّ عند الطلب! زي ما الواحد يتصل بالدليفري: “ألو… زلزال وسط على تركيا… وكبير على إسبانيا… ومعاه هزّة خفيفة على روسيا وانت معدّي”.
‏طب يا قمر مغيم ومتنيل… إسبانيا اعترفت بفلسطين قبل زيارة السيسي بـ9 شهور! ولا إسرائيل عندها ريموت بأثر رجعي كمان زي الضريبة المتأخرة؟
‏والكوميديا الحقيقية إنك بتتكلمي عن “العقاب الإسرائيلي” في نفس الوقت اللي مصر كانت فيه موقّعة أكبر صفقة غاز في تاريخ إسرائيل: 35 مليار دولار و130 مليار متر مكعب لحد سنة 2040! وإنتِ عارفة يا دكتورة إن روسيا بتبيع الغاز لأوروبا بخمس دولارات للوحدة… ومصر بتشتري من إسرائيل بـ7.64 دولار؟! ده مش عقاب، ده عقد إذعان! إسرائيل ما هزتش الأرض… إسرائيل هزّت جيب المصريين، وبأرقام معروفة للعالم كله.
‏وبعدين… إنتِ مش بس بتفتكري غلط، إنتِ حتى بتكتبي غلط. “مقاتلات KAN”؟ اسمها KAAN. الفرق بينهم زي الفرق بين “حمار” و”حمّار”… واحدة كائن، والتانية سايق الكارو!
‏إسمعي… الزلازل موجودة من قبل ما الإنسان يعرف يولّع نار. سببها حركة الصفائح التكتونية، مش كبسة زر من نتنياهو. تركيا قاعدة على أخطر خط صدع في العالم، وإسبانيا بين صفيحتين بيتخانقوا من قبل أيام الرومان. ولو إسرائيل فعلاً معاها ريموت زلازل، كانت جربته على إيران وحزب الله وحماس  قبل ما تفتكر إسبانيا.
‏لكن المصيبة مش في الخرافة… المصيبة إنك شغّالة في أكبر شركة إعلامية مخابراتية في مصر، شركة المتحدة، الشركة اللي المفروض تنوّر الشعب… بقت تطفي النور وتشغّل قناة المؤامرات الليلية. واضح إنكم شايفين الـ100 مليون مواطن قطيع لازم يشرب جرعة هري كل يوم قبل النوم.
‏الحقيقة الوحيدة: الزلزال الحقيقي مش تحت رجلين المصريين… الزلزال في دماغهم  لما نسمح للهري ده يدخل ويقعد. ومن مجدي يعقوب وزويل… وصلنا لسمية عسلة والزلازل بالطلب!
‏فاسمعيها مني: لو ده اللي بتسميه "عقاب إسرائيلي"، فأقولك… العقاب مش هزة أرضية، العقاب جالك في الفاتورة.  خلاص كده انا خلصت دلوقتي افرشي لي الملايه وقولي انا ملكه فرعونيه وجدي كان باشا وجد جدي رمسيس.  ماهو الكلام ببلاش خصوصا لمن يكون هري من عيار ابوزيد ورشاد. وبالله عليكي ماتصوريش فيديو بفلتر وانتي بتدعي عليا عند سيدك مرسي ابوالعباس.